Ulloq 10. maj 2000 UPA 2000/13
Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut
pillugu
ISUMALIUTISSIISSUT
Inatsisartut Akileraartarnermut Akitsuusiisarnermullu Ataatsimiititaliaannit
aappassaaneerinissamut saqqummiunneqartoqInatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Per Berthelsen (S), siulittaasoq
Inatsisartuni ilaasortaq Anders Andreassen (S), Inatsisartuni ilaasortamut Hans Enoksenimut (S) sinniisussatut peqataasoq
Inatsisartuni ilaasortaq Lars Sørensen (IA)
Inatsisartuni ilaasortaq Daniel Skifte (A)
Inatsisartuni ilaasortaq Mads Peter Grønvold (K)
Inatsisartut Akileraartarnermut Akitsuusiisarnermullu Ataatsimiititaliaata aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut 2000-imi majip qulingiluaanni ataatsimiinnermini oqaluuseraa.
Siunnersuuteqarnermi siunertarineqarpoq nunamut tamarmut akileraarutip aamma nunamut tamarmut akileraarutip immikkut ittup procentissaannik aalajangiinissamut killissarititap 1. november nallertinnagumiit 1. december nallertinnagumut sivitsorneqarnissaa.
Killissarititamik sivitsuiniarneq taanna Naalakkersuisut piffissap Inatsisartut ukiakkut ataatsimiinnerata aallartittarfiata kinguartinneqarnissaanik kissaataannut attuumassutilittut isigineqassaaq.
Piffissaq Inatsisartut ukiakkut ataatsimiinnerata allartittarfia kinguartinneqarpat Inatsisartut aningaasanut inatsisissaannut siunnersuutip Inatsisartunit peqqissaartumik suliarineqarsinnaanissaanut piffissaqarluarnissaq qulakkeerumallugu piffissap Inatsisartut ukiakkut ataatsimiinnerata naammassiffissaata kinguartinneqarnissaa pisariaqassaaq. Taamaammat Naalakkersuisut aningaasanut inatsisip akuersissutigineqareersimanissaanut piffissaq kinguartinneqartussanngorlugu missingersuusiortarnermut inatsisip allanngortinneqarnissaa pillugu siunnersuummik aamma saqqummiussaqarput.
Siunnersuut siullermeerneqarmat oqaaseqartuutitat arlallit kissaatigaat akileraarutissat procentissaannik aalajangiinissamut killigititaq 15. novemberimut ullulerneqassasoq.
Inatsisartut Akileraartarnermut Akiitsuusiisarnermullu Ataatsimiititaliaat aamma isumaqarpoq Kalaallit Nunaanni Inatsisartut Suleriaasiannut allannguutissatut siunnersuummi takuneqarsinnaasutut piffissaq Inatsisartut ukiakkut ataatsimiilerfissaat taamaallaat septemberimi tallimanngornerit aappaanniit pingajuannut kinguartinniarneqarmat akileraarutissat procentissaannik aalajangiinissamut killigititap 1. decemberimut kinguartinneqarnissaa pisariaqanngitsoq.
Inatsisartut Akileraartarnermut Akitsuusiisarnermullu Ataatsimiititaliaata tamatumani ilanngullugu annertuumik pingaartippaa killigititap 1. decemberimut kinguartinneqarnissaata kommuninit arlalinnit nangaanartoqartinneqarnera.
Inatsisartut Akileraartarnermut Akitsuusiisarnermullu Ataatsimiititaliaata tassunga atatillugu erseqqissassavaa akileraarutissat procentissaannik aalajangiinissamut killigititap kinguartinneqarneratigut kommunit Namminersornerullutillu Oqartussat aningaasatigut missingersuusiat pilersaarusiornerini ataqatigiissaarinerusalernissaat pisariaqalissasoq - pingaartumik sanaartugassanut tunngasut eqqarsaatigalugit.
Taamaammat Inatsisartut Akileraartarnermut Akitsuusiisarnermullu Ataatsimiititaliaata Naalakkersuisut kaammattorumavai taamatut ataqatigiissaarinerusalernissamut pimoorullugu peqataaqqullugit.
Inatsisartut Akileraartarnermut Akitsuusiisarnermullu Ataatsimiititaliaata naammagisimaarlugu paasivaa Naalakkersuisut siunnersuutip uuma aappassaaneerneqarnissaanut allannguutissatut siunnersuummik, akileraarutit procentissaannik aalajangiinissamut killigititap 1. december nallertinnagumiit 15. november nallertinnagunngortillugu allanngortinneqarnissaanik imalimmik, saqqumiussilersaartut.
Akileraartarnermut Akitsuusiisarnermullu Ataatsimiititaliap isumaqatigiittup matumuuna inassutigaa aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut Naalakkersuisut allannguutissatut siunnersuummik siuliani taaneqartumik saqqummiussereerpata iluseriligassamisut iluseqarluni Inatsisartunit akuersissutigineqassasoq.
Per Berthelsen Anders Andreassen
Lars Sørensen
Daniel Skifte
Mads Peter Grønvold